Om oss

Frank var ein kar med mykje kreativitet og skaparevne som ikkje let seg stogge av reguleringsplanar og byråkratiske søknadsprosessar. Kommuna prøvde i si tid å stogge bygginga av byggverka til Frank med henvisning til byggningslova. Kreative Frank svarte då med at dette ikkje var byggverk, men kunstverk. Og kunstverk er beskytta av åndsverkslova.

Det som i tidligare tider var eit lite gardsbruk med geiter, høner og nokre kviger vart omgjort til ein liten serveringsstad med plass til eit tjuetals gjestar. 

Etterkvart som det gjekk gjeteord om denne vesle staden så byrja plassen å bli for liten og Frank fekk med seg vener og bygde på tunhuset med eit påbygg. Og så eit påbygg til. Så ein stor terasse. Og så ein stor terasse til og så vidare og så vidare…

Når Tussa Kraft skulle opne sitt nye kraftverk på Trandal i 2007 inviterte dei sjølvsagt til fest på Christian Gaard og sjølvaste Baarelaget spelte opp til dans frå nybygd scene. Dette var spiren til det som seinare utvikla seg til Trandalblues. Ein bluesfestival som i dag tiltrekker seg bluesfans frå heile landet.